Прп. Сергий Радонежский

Тропарь преподобного Сергия, глас 4:

          Иже добродетелей подвижник,/ яко истинный воин Христа Бога,/ на страсти вельми подвизался еси в жизни временней,/ в пениих, бдениих же и пощениих образ быв твоим учеником,/ темже и вселися в тя Пресвятый Дух,/ Его же действием светло украшен еси;/ но яко имея дерзновение ко Святей Троице,/ поминай стадо, еже собрал еси мудре,/ и не забуди, якоже обещался еси,/ посещая чад твоих,// Сергие, преподобне отче наш.

Кондак  преподобного Сергия, глас 8:

 Христовою любовию уязвився, преподобне,/ и Тому невозвратным желанием последовав,/ всякое наслаждение плотское возненавидел еси/ и, яко солнце, Отечеству твоему возсиял еси;/ тем и Христос даром чудес обогати тя./ Поминай нас, чтущих пресветлую память твою, да зовем ти:// радуйся, Сергие, богомудре.

Ин кондак  преподобного Сергия, глас 8:

    Яко безплотным равножитель,/ всех преподобных превзошел еси/ постническими труды и бден  М о л и т в а.ии молитвенными, мудре Сергие,/ тем восприял еси от Бога исцелити недуги и прогоняти бесы,/ и того ради вопием ти:// радуйся, отче преподобне Сергие.

Величание:

     Ублажаем, тя,/ преподобне отче наш Сергие,/ и чтим святую память твою,/ наставниче монахов и собеседниче ангелов.

Молитва

       О, священная главо, преподобне и Богоносне отче наш Сергие, молитвою твоею, и верою, и любовию, яже к Богу, и чистотою сердца, еще на земли в обитель Пресвятыя Троицы душу твою устроивый, и ангельского общения и Пресвятыя Богородицы посещения сподобивыйся, и дар чудодейственныя благодати приемый, по отшествии же твоем от земных наипаче к Богу приближивыйся, и Небесныя силы приобщивыйся, но и от нас духом любве своея не отступивый и честныя твоя мощи, яко сосуд благодати полный и преизливающийся, нам оставивый! Велие имея дерзновение ко Всемилостивому Владыце, моли спасти рабы Его, сущей в тебе благодати Его верующия и к тебе с любовию притекающая. Испроси нам от великодаровитаго Бога нашего всякий дар, всем и коемуждо благопотребен, веры непорочны соблюдение, градов наших утверждение, мира умирение, от глада и пагубы избавление, от нашествия иноплеменных сохранение, скорбящим утешение, недугующим исцеление, падшим возставление, заблуждающим на путь истины и спасения возвращение, подвизающимся укрепление, благоделающим в делах благих преуспеяние и благословение, младенцем воспитание, юным наставление, неведущим вразумление, сиротам и вдовицам заступление, отходящим от сего временного жития к вечному благое уготовление и напутствие, отшедшим блаженное упокоение, и вся ны споспешествующим твоими молитвами сподоби в день Страшного суда шуия части избавитися, десныя же страны общники быти и блаженный оный глас Владыки Христа услышати: приидите  благословении Отца Моего, наследуйте уготованное вам Царствие от сложения мира. Аминь.